Hemen dauden pertsonak gazte ekintzaileak dira. Saint Louis hirian eta Gandioleko landa-komunan bizi dira, Senegaleko iparraldean. Haietako bakoitzak proiektu pertsonala jarri du martxan, bere talentuak eta gaitasunak garatu eta, horri esker, irtenbide profesionala izateko. Beren ingurua irakurtzeko eta erantzunak bilatzeko gai dira denak, eta bizi diren testuingurua hobetzen laguntzen dute. Eta, bide horretan, funtsezkoak dira artea eta komunikazioa; izan ere, sormen-industriak garapen betean daude herrialde horretan. Hahatay son risas de Gandiol elkarteko taldeak koordinatuta, Massow Ka argazkilariak —«El Junior» arlo profesionalean— egin ditu argazkiak. Gainera, Saint Louiseko gazte ekintzaileetako bat denez, bera ere ageri da erakusketan. 2015az geroztik, eragin soziala duten tokiko ekimenak sustatzen eta babesten dihardu Hahatay elkarteak, eta Afrikako eta Europako gazteentzako prestakuntza-programetan hartzen du parte. Programa horien helburua gazteek kulturarteko enpresak sortzea da, baterako erronkei erantzun diezaieten. KCD GGKEk, Hahatayren euskal bazkideak, ahalegin horiek babesten ditu 2017az geroztik, euskal lankidetzaren bidez.